上午去 婆婆 家清洗屋企的地氈，BB表妹 已經識行識走啦，仲行得好快呀，

BB 每次見到我地開頭都會好驚，避開我們，偷望我們，怕羞似的，但 BB 又好快和我們熟絡，

仲好活潑無時停，抱起 BB 時 BB 會手腳揮動，無聲抗議，還是放 BB 落地走吧!

可惜的事下午要返工不能繼續和 BB 玩，這時我好唔捨得地離開，走時仲令到 BB 哭了起來，

因為我們笑說和 BB 去街街，這時 BB 好認真地跟住我們行出去，還上了 Stream 仔，

BB 確實好想出街呀，當我們準備開車時，BB 就哭啦，唯有下次再同你玩過啦。


最近又煲完一套日劇 "猟奇的な彼女"，改篇 韓劇 "我的野蠻女友"，

但其實可以當新一套劇集黎睇，係一套唔錯的愛情劇，

套劇有好多攪笑片段，亦有好多好多感性的說話，令人好感動，

男主角 草剪剛 的表情好得，女主角 田中麗奈 係我中學時代好鐘意的。

Andy Yan 的婚禮係今日即 12 月 31 日舉行，地點係 尖沙咀 廣東道，最多人倒數的地方，

你話係咪大整蠱呢?  哈哈，不過我都好開心因為係咁特別既日子慶祝 Andy 的婚禮，

令我有個難忙的倒數日，雖然認識 Andy 只是短短幾個月但在同事裡我和 Andy 好 fd 嫁，

因為我地都係 阿仙奴 既超級粉絲呢!  還記得第一次和他出街共事時，

他穿著着 阿仙奴 的 T-Shirt，發現他是 阿仙奴 fans 後，我們的話題就停不了，

分享對 阿仙奴 的睇法，收藏了什麼 阿仙奴 的物品，去 London 時的開心等等..... 

婚禮結束後已是 11:30，這時我趕往巴士站想盡早上車避開倒數的人潮，

好開心地係 12 點前上到車，但當車駛到接近 奧海城 時，巴士停滯不前，

呆等半小時後才陸陸續續通順，始終都係避不了，回到家已是 1:30 呢，沖完涼上網輕鬆下，

到了 3 點我開著 Stream 仔 出 元朗 接載兩個係 Disneyland 放工的 細妹 回家，

在此祝 Andy 新婚愉快，祝大家新年快樂!

晴天，約了舊同事去 BBQ，早上 Fion 、 Cat 和我係 元朗 買燒烤的食物，之後出發去 川龍 BBQ，

由於其他人未到，我們去了附近既 農場鮮奶 食芒果布甸，又幾好味wo，好香芒果味，正!

燒烤完後，蛓他們出 荃灣，途中 Benny 提議順便上 大帽山山頂 行下，

跟住 Stream 仔 就載住我們 7 個人上山，載住 7 個人上山的 Stream 仔 都無腳軟，

150ps 馬力又再發揮他的力量，大帽山山頂 都幾凍呀，有涼意，影了幾張相就走人。

下次可以試下黎 大帽山山頂 睇日出，唔知有無人陪我癲......   haha

放工後又再去影聖誕燈飾，影燈飾前去重慶大廈食傳說中既咖哩，由 Andy Cheung 既 女朋友 帶路，

只係接了一張宣傳單張其他派宣傳單張的人風湧而至，食物味道唔錯，下次可以食辣 D。

又係 post 相時間啦......    haha

時間過得真快，一瞬間 Stream 仔 已經半歲了，這半年和 Stream 仔 去過 4次 機場, 3次 西貢, 2次 大帽山,

3次 白泥 等等........  都算去得幾多地方。開左 Stream 仔 半年，講下感受先，7 坐位可以載全家人去玩，

的確開心，唔使再迫，載多幾個朋友又得，雖然我唔會開快車但 150ps 的馬力，同以往 100ps 的 Corolla，

有著頗大的分別，由於新 engine 未 run in 完，所以都唔會開太大的轉數，通常都係 under 3000轉，

雖然 under 3000轉，但我對這加速力都幾滿意，0-100 km 可以較快達到....  感覺幾爽嫁!

以前我會說開 1500cc 大約 100ps 的私家車夠我用啦，但現在我會說如經濟許可的話我唔會 downgrade 囉，

除非該車款真係好鐘意啦，現實例子就係 Toyota 既 bB，真係好得意嫁。不過我鐘意既車實在太多啦，

只能買模型才可滿足我的欲望，在現實生活裡我亦唔喜歡經常換車，現在的 Stream 仔 更加唔會換啦，

我好希望由新車一直 keep 落去，一路幫 Stream 仔 扮靚靚，一手一腳打理到最後。

放工後，和同事們出發到 尖沙咀 影燈飾，食完飯後正式展開攝影學堂第一堂，

有了兩位大師級既講解令我對攝影多一點認識，由於進度太慢，到了 11 點，還在海旁，

唔夠時間去影海港城，所以可能有 part 2。下面就係我 D 傑作啦.....  哈哈

當晚學會了白平衡，改變白平衡可以令同一個海港變成唔同既感覺，我覺得好得意。

自對上兩個星期六踢波整損手腳，痛足整個星期，每天都好怕沖涼，

因為沖涼就好像在傷口上灑鹽，超痛，步行時亦要就住就住，真慘。

今天痛口已經好返好多啦，今個星期六可以踢返波啦。

Stream 仔 變靚第四擊，實用篇，尾排地毯，有時放下餸都唔怕整污穢 Stream 仔。